recent

آخر الأخبار

recent
جاري التحميل ...

ادمان المخدرات في السودان وضرره علي المجتمع


الليلة المقالة دي مختلفة شوية لا فيها اخبار السودان لا فيها عناوين الصفح المقالة بتتكلم عن المخدرات 

بما انو تعاطي المخدرات يتزايد بين شباب السودان
وانتشار المخدرات وسط النساء والطلاب وارتفاع نسبة التعاطي

عليك الله يالبتقرأ  المقالة دي اعمل ليها شير في كل السوشال ميديا العندك
مشاركة البوست ماصعبة ولا بتكلفك شئ






..
عزيزي مدمن المخدرات ..
بعد التحية وكامل الاحترام ..
..
اول شئ ياخ انا بحبك شديد ، وحبي ليك ده هو الخلاني اوجه ليك الرسالة دي ..
..
اول شئ حقو تعرف إنو إدمانك ده ماحا يضرك انت براك ، لو كان الضرر حايقع عليك براك صدقني ماكان حااتكلم معاك ، لكن الضرر ده حايقع علي المجتمع كلوووو ، وأول ناس حايقع عليهم الضرر هم اهلك وناس بيتك ...
..
ماإتخيلت تأثير الحاجة دي علي امك لما تعرف انو انت مدمن بتاع مخدرات ..
هل اتخيلت كمية الألم الممكن تسببو ليها ؟
وأبوك المسكين تعبان وشقيان وراك اتخيلت حالتو حاتكون كيف لما يعرف انك مدمن ؟
..
اخواتك الفي البيت الحاتوقف حالهم ويهربوا منهم الازواج بسبب ادمانك قادر تتخيل شعورهم لما واحد يفسخ خطوبتو منها ويوقف مشروع الزواج من أختك لما يقول ليها كلمة واحدة ( أنا مابرضي اولادي يكون خالهم مدمن ) قادر تحس الاحساس ده ؟
..
لما الناس الفي الحلة والنسوان الفي الحلة يبدوأ يتكلموا عنك ويقولوا ماعندوا اهل لو كان عندو أهل قادرين عليهو ماكان بقي مدمن قادر تتخيل معاي حسرة اهلك وامك وابوك وهم بيحسوا انهم فشلوا في تربيتك وسيرتهم بقت علي لسان البيسوي والمابيسوي قادر تتخيل ده ؟
..
اي انت بتكون مبسوط ومنتشي وعايش في دنيا تانية عشان كده مابتحس بالحاجات البتحصل بي سببك لانك ببساطة أنت مغيب وما واعي ..
..
قادر تتخيل معاي لو أنت يوم مالقيت حق سيجارة البنقو ولا حق حبة الترامادول ولاحق حقنة الهيروين ولا حق اي سم هاري أنت بتتعاطاهو إنت ممكن تعمل شنو ؟
..
تعال اوريك منظرك وصورتك الماشايفا في سبيل انك تتحصل علي الزفت البتشربوا او بتبلعوا او بتشموا :
اول شئ حاتتذلا للبيسوي والمابيسوي عشان يديك قروش وحاتلقي البيديك لانو هو ماعارفك مدمن ومصيرك تتعرف وحايرفض تاني يديك ، هنا حاتنتقل للمرحلة التانية .
حاتبدأ تبيع حاجاتك الانت بتحبها في سبيل انك تجيب سيجارة لحدي ماتحصل انك تبيع هدومك شفت كيف 😢
..
ولما ماتلقي شئ تبيعوا حاتنتقل للمرحلة التالتة وهي إنك تسرق ، حاتبدأ تسرق عدة امك البتتفاخر بيها ، وحاتسرق دهبا وحاتسرق القروش من ابوك القروش التعبان فيها عشان يوفر لاخوانك واخواتك الصغار عيشة كريمة ، من مدمن حاتبقي حرامي وحاتبقي زول بيشيل حق اخوانو عشان يعيش لذة مهلكة
..
ولما يكشفوك ماحاتخجل من نفسك وحاتبدأ تنتقل لي مرحلة اخطر حاتتحول من الزول الوديع الطيب المسكين لي زول كعب واخلاقوا كعبة ومن محبوب حاتتحول لزول مكروه وحاتحس بي عزلة الا من رفقاء السوء وشبهينا واتلاقينا وزي ماقال المثل (وافق شن طبقة)..
وهنا حاتجي اللحظة الحاتخليك منغمس في عالم الاجرام لما تقول للمروج انا ماعندي لكن اديني حااجيب ليك ويقوم هو يستغلك ويقول ليك ماعندنا شئ مجان لكن ممكن تشتغل عشان تطلع حق جرعتك ايوة دي القاصدة انا تشتغل مروج وتبدأ تبيع ، وبدل مدمن وحرامي وزول كعب بقيت مروج وهدمت نفسك ومستقبلك وهدمت غيرك ومجتمعك ونهايتك حاجتين مافي ليهم تالتة :
يا إتقبضت ومشيت السجن ، يا مت بجرعة زائدة وفي الحالتين ماتعاين للمجتمع عاين بس لأسرتك التعبت فيك عشان تبقي زول ، عاين لحجم الألم السببتوا ليهم ، وخليت الالسن تنهش في سيرتهم ..
..
ده غير الحاجات الممكن تعملا بسبب عدم الاتزان العقلي نتيجة الادمان ، ممكن تضرب امك ، ممكن بدون ماتشعر تبقي ذئب بشري مغتصب ، ممكن تعمل الفاحشة مع بنتك ، وممكن تبقي ديوث عشان تلقي حق الجرعة وتخلي الرجال ينتهكوا عرضك لانك خلاص بقيت معدوم الشهامة والنخوة ، وممكن تقتل ، كلها حاجات احلاهما مر كلو بسبب المزاااج والكيف الحرام ، بسبب إدمانك ..
..
اصحي وماتعيش وهم انو المخدرات بتخليك عبقري وبتساعدك في قرايتك ومشاكلك ، لا فوق ده وهم كبير ، ماتتغشا بالفنانين والممثلين البيتعاطوا وانت قايلهم عباقرة مافي عبقري وزول وضع بصمة مدمن ، نيوتن ، باستير ، وكل العلماء والناس الناجحين من زمان ولحدي زمن بيل قيتس ومارك بتاع الفيس ده ماكانوا مدمنين عاين لي ديل ماتعاين لي لي ناس بوب مارلي وتوباك والجماعة ديل ،أنت عندك دين وقيم بتمنعك المفروض تحافظ عليها ...
..
اتمني ياخوي وياختي المدمنين ماتستهتروا بي كلامي ده ، اقروه كويس وحاولوا الحقوا روحكم محتاجة منكم لي إرادة قوية ، بدل ماتتذكروه وانتوا مسجونين ولا منبوذين ولا مفارقين الحياة بجرعة زائدة ، عشان خاطر أمك ، ابوك ، عشان خاطر اخوانك المحتاجنك سند وفزع ماتبقي ليهم وجع وتضيع نفسك وتضيع الحولك .
..
وأنت البتقرأ ده ماتنسي تعمل مشاركة ، مابتضرك بي شئ ولابتأخد منك وقت زر المشاركة اسفل المقال فيس واتس وغيرو

عن الكاتب

اخبار السودان ، مدون عربي سوداني محب لمجال التقنية والعلوم والتوثيق والثقافة ، اسعى لتقديم الافادة للناس ،

التعليقات



إذا أعجبك محتوى موقعنا نتمنى البقاء على تواصل دائم ، فقط قم بإدخال بريدك الإلكتروني للاشتراك في بريد الموقع السريع لتصلك اخبار السودان واسعار العملات اولاً بأول

إتصل بنا

مدونة اخبار السودان

مدونة أخبار السودان مدونة سودانية تشمل جميع الاخبار المحلية والعالمية لحظة بلحظة وتنشر المدونة الاخبار السياسية و الاقتصادية والفنية من جميع المصادر الموثوقة

جميع الحقوق محفوظة

اخبار السودان

2017