القصيدة المؤهلة للمرحلة الآخيرة للشاعر قاسم صديق الزبير من مسابقة شاعر سوداني القصيدة المؤهلة للمرحلة الآخيرة للشاعر قاسم صديق الزبير من مسابقة شاعر سوداني - اخبار السودان
recent

آخر الأخبار

recent
recent
جاري التحميل ...
recent

القصيدة المؤهلة للمرحلة الآخيرة للشاعر قاسم صديق الزبير من مسابقة شاعر سوداني

القصيدة المؤهلة للمرحلة الآخيرة من مسابقة شاعر سوداني


السودان قبلةً للثقافة والمثقفين فى مجال الشعر والشعراء والأدب والغناء ، حيث تمثل قطاعات الشباب وقوداً لهذا الحراك الذى يجد القبول والجماهيرية والشعبية من فئات مختلفة من شعب السودان ، لذا تأتي مبادرة (شاعر سوداني) سعياً لتوظيف طاقات الشباب الشعرية بضروبها المتنوعة فى موسمها الأول والتى إتخذنا لها إسم (شاعر سوداني)
بعد انتها فترة الاشتراك بمسابقة شاعر سوداني (اضغط هنا للانتقال الي شروط المسابقة )  الان نطرح لكم متابعينا الكرام بعض القصائد المؤهلة للمرحلة الاخيرة


القصيدية الاولي للشاعر :  قاسم صديق الزبير عبد الوهاب



انا الزول البطير بالريده من غير ريش
وانا الزول البجيب للبعشقو المافيش

انا الما برضي من مريودي بالتهميش
انا الرضيان اموت شان البريدو يعيش
انتي الجنه إِلا قْطوف هواك ما دانيه
انتي النار تحرِّقي في البسيطه الفانيه
انتي الاولي ، وانتي المافي بعد تانيه
وانتي (بريئه) لكن برضو انتي الجانيه
يا الدكتوره جيناك و المنام جافينا
زدتي وجعنا ربي يسامحك و يعافينا
اصلو الحظ معاندنا و عِكر صافينا
والبتعالج الناس ذاتا .. تمرِض فينا
انا بتمني شوفتك و بيها بحلم صاحي
وانتي ان غبتي بتغيب بهجتي و افراحي
انا يا غاليه منك بستلذ بي جراحي
وانتي ان ما كتلتيني اصلو ما بترتاحي
نارك نار جهنم ما في شي بتطفيها
محياك كالقمر كل النجوم يخفيها
زي شمس الله عينيك الشعاع حافيها
لا بنعيش بدونها .. ولا بنعاين فيها
منك ياما عشاق متلي صدو قماحه
منك انتي حتي المهره ماخده جماحا
وقت ماا الاقي عينك و فيني ترمي رماحا
بتجهجه مسافه و اشوف سماحه سماحه
شامتك و وجنتيكي و جوز عيونك ديلا
خلن قلبي _ من شفتك _ يدق لي الليله
مفروض ريدي ليك يا عجوة القنديله
يصبح من حكايات الف ليله و ليله
من ما تهلِّي بتفوح ريحه الياسمين
و من ما تمشي تلقي الامه منقسمين
واحدين عاشو اخوان فيكي متخاصمين
و واحدين شافو عينيك ماتو مبتسمين
أمْلي حياتي بالأحزان و شيلي افراحا
و خلي هواكي يبقالها الملح لي جراحا
اطلقي لي جيوش عينيك عليّ سراحا
وأتعبي قلبي زي ما دايره . تعبك راحه
كيف ما بين مقامك النجوم واسيتي ؟
و وين من عين بتدمع شانك اندسيتي ؟
يا البي ألمي من ما قمتي ما حسيتي
انا امسيت متيم انتي كيف امسيتي؟
وين زولي البضمد جرحي قبل جروحو ؟
وين الفي درب ريدو الفطاحله بروحو ؟
كيف ما اموت و قلبي معاهو باني صروحو ؟
كيف الزول بعيش يا خواننا من غير روحو ؟
الحب اعكِّر الكون شان اخليك صافيه
الحب قَدمي شانك تدخل النار حافيه
الحب يا سبب جني وبكاي و القافيه
هو المرض الوحيد الأحلي من العافيه
الريد جن عديل ما عندو اي ضمان
مرات يبقي خوف مرات تحسو امان
يوم يبقالنا مرضه ومره يبقي ادمان
والريد كان بيكتل كان كتلني زمااان
الحب غاية والحب في الحقيقه وسيله
والحب آية و الحب حاجه مافي مثيلا
الحب قصة يصعب شرحها و تفصيلا
والحب بمحا دمعات العشوق و بسيلا
بالحب تلقى امثال في التفاني انضربن
تلقى جسومنا بعدن والقلوب اقتربن
الحب منو تلقى دموعنا بالدس هربن
والحب ياما خلا ارواحنا ترقص طربا"
القوي اضعفو الحب و الضعيف قوّاهو
بالحب تلقى زول المستحيل سوّاهو
ذي ما أظمأ الحب المُحب روّاهو
كم ضلّم مضوّي و كم ضلام ضوّاهو
الحب سِكَّه قاسي علي الأحِبه مسيره
بيهو عقولنا مشغوله و قلوبنا اسيره
الحب كلمه و الحب جمله و الحب سيره
و الحب بجعل الحاجه العسيره يسيره
الحب شوق ولهفه و خوف لوعه و غيره
الحب أمان و عطف وحنان و راحه وحيره
الحب ام و أب و اولاد و بيت وعشيره
الحب نجمه في عتمة قلوبنا منيره
الحب فينا حساسة و رهيفه اوتارو
الحب هو البيختار مافي زول بختارو
الحب فيهو آلاف الفلاسفة احتارو
الحب بكتلك عادي و بيطلب تارو
الحب شجره ساسا الاحترام ما المال
شرابا الاهتمام و بيكتلا الإهمال
بترمي الضل و تنضج لما تبقا حلال
بتزهر بي الزواج شان تثمر الاطفال
زي ما الحب جحيمو بسيب قلوبنا معانية
برضو بيحتوي الجنة ام قطوفا" دانية
الحب ماهو يوم بجي من سنة ولي التانية
الحب ذاتو عيد بنعيشو في كل ثانية

عن الكاتب

اخبار السودان ، مدون عربي سوداني محب لمجال التقنية والعلوم والتوثيق والثقافة ، اسعى لتقديم الافادة للناس ،

التعليقات



إذا أعجبك محتوى موقعنا نتمنى البقاء على تواصل دائم ، فقط قم بإدخال بريدك الإلكتروني للاشتراك في بريد الموقع السريع لتصلك اخبار السودان واسعار العملات اولاً بأول

إتصل بنا

مدونة اخبار السودان

مدونة أخبار السودان مدونة سودانية تشمل جميع الاخبار المحلية والعالمية لحظة بلحظة وتنشر المدونة الاخبار السياسية و الاقتصادية والفنية من جميع المصادر الموثوقة

جميع الحقوق محفوظة

اخبار السودان

2017